Una dii chena Bing, DuckDuckGo, ChatGPT e àterus

Ariseu, giòbia 23 maju de su 2024, est stètia una dii strana po is servìtzius web. Calincunu de bosàterus s'at a essi acatau chi servìtzius medas comenti a Bing, ChatGPT, DuckDuckGo, Yahoo! e Ecosia no fiant funtzionendi, ma si sinnalant fintzas problemas a Copilot, TeamViewer e àterus servìtzius.

Segundu DownDetector is problemas funt incumentzaus pagu apustis de is 7:00 (ora sarda) e ant incumentzau a passai apustis de is 16:30.

Is comunicatzionis in contu de su problema funt stètias genèricas meda in s'interis de sa dii, ma gràtzias a unas cantu notas, che sa de ChatGPT, est cunfirmau chi totu est incumentzau cun problemas in su motori de circa Microsoft Bing. Bing difatis (comenti puru Google e àterus) ponit a disponimentu unas cantu funtzionis (API, Application Programming Interfaces) chi àterus servìtzius podint impreai. Yahoo! po esempru partendi de su 2008 no tenit prus unu motori de circa suu ma amostat is arresurtaus de su de Microsoft. Funt medas is servìtzius chi ponint aficu a Bing po traballai e custus puru no ant pòtziu funtzionai agiumai totu sa dii.

S'autori de custu artìculu at tentu problemas fintzas cun Startpage.com chi in teoria dipendit de Google e no de Bing, ma podit essi unu problema ligau a su càrrigu straordinàriu: is impitadoris de is servìtzius blocaus ant de seguru incumentzau totu in una a impreai Google, carrighendi s'arretza sua prus de su sòlitu.

Su guastu est oramai arrangiau, ma abarrat disconnotu su naturali suu, ca Microsoft no at giau spricu perunu: no scieus si s'est tratau de unu dannu fìsicu, una faddina de programatzioni, una medida de seguresa o s'arresurtau de un'atacu informàticu. De seguru est de interessu chi sa farta de unu servìtziu potzat creai totu custu disàgiu in s'arretza: is ainas in s'arretza parint medas, ma apustis scoberreus chi is frunidoris berus funt pagus e de seguru no est beni chi sa decisioni de si fai agatai unu situ o no siat in manu a pagus asiendas mannas.