LG presentat una mascaredda eletrònica

Ocannu nos semus acostumados a pònnere mascareddas pro nos amparare contras a su Coronavirus. Nd'amus connotu de ònnia genia: chirùrgicas, FPP2, etc, ma s'eletrònica dda depìamus ancora bìere.
Nc'at pensadu LG, chi at annuntziadu sa mascaredda a baterias.

Custu aparatu est parte de sa lìnia de produtos PuriCare, fatos pro limpiare s'àera dae smog, fumu e prùere gràtzias a coladores HEPA H13. S'annùntziu no chistionat de Covid-19 a manera crara, però narat chi sa mascaredda portat lughes LED-UV chi ochint is microrganìsimos.

Sa màscara si podet acapiare a un'aplicatzione pro telefoneddu chi narat candu est su momentu de cambiare is coladores. Ònnia parte de s'aparatu si podet retziclare, fadende·nde unu produtu ecològicu.
No ischimus meda in contu de sa comodidade de portare acapiadu a sa cara custu aparatu chi, craru, at a èssere prus grae de una mascaredda clàssica.