Publicadu FreeDOS 1.3

Una pariga de dies a oe amus chistionadu de sa publicatzione de una versione noa de ReactOS, clone de Microsoft Windows. Paret duncas ironia chi apant publicadu puru una versione noa de FreeDOS, sistema operativu chi amegat de clonare MS-DOS, àteru prodotu Microsoft chi impreaiamus in antis de sa publicatzione de Windows 95.
Sa versione noa est sa 1.3 e nd'amus chistionadu un'annu e mesu a oe, creende chi fessint acanta de ddu publicare.

No ddoe at una lista cun totu is càmbios de sa versione noa cumparada cun sa 1.2, duncas si depimus ammarolla acuntentare de su chi narat s'annùntziu:

• sa versione de FreeCOM, s'interfache de impitadore, lompet a sa 0.85a;
• su nùcleu lompet a sa versione 2043;
• suportu de FAT32 pro sa versione pro protzessores 8086. In custa manera ant a funtzionare fintzas discos fissos prus mannos;
• sa versione in discos floppy impreat sa cumpressione, duncas nd'ant a serbire prus pagos;
• suportu pro sa retze;
• programmas e giogos noos.

Su sistema faghet a dd'iscarrigare dae su situ ufitziale e podet èssere impreadu in computadores cumpatìbiles cun PC (protzessores de s'architetura x86 e x86-64, sa parte manna de is chi impreamus in domo) o in màchinas virtuales.

S'immàgine de s'artìculu est propiedade de su FreeDOS Project.