Publicadu FreeDOS 1.3-RC3

Pro sa felitzidade de is amantiosos de is elaboradores de is annos 80-90, est acanta a essire una versione noa, 1.3, de FreeDOS, unu sistema operativu chi clonat MS-DOS, su sistema Microsoft abbandonadu a pustis de sa publicatzione de Windows 95 e benidores.

Sa versione 1.3 est unu megioramentu de sa 1.2, cun sa creatzione de unu discu chi permitit de proare su sistema sena dd'installare (CD Live), pachetes noos de programma, s'annoamentu de is chi ddoe fiant giai e una mègius cumpatibilidade hardware.

Una pariga de dies a oe ant publicadu sa de tres versione realease candidate 1.3-RC3. Bolet nàrrere chi, a foras de unas cantas minudas, sa versione noa est pronta e at a èssere publicada a curtzu. In s'ìnteri, sa RC3 podet èssere iscarrigada dae su giassu ufitziale.

FreeDOS, chi podet pàrrere un'idea a foras de su tempus, est frunidu de una programmera rica, cun connessiones de retze, navigadores web, ainas pro programmare e meda àteru, pro nde fàghere unu sistema lèbiu ma cumpridu, bonu pro is elaboradores betzos ma bàlidu puru pro sistemas integrados, impreos ispetzializados e totu su chi sa fantasia si podet imbentare.