Arribadu ReactOS 0.4.14

Amus saludadu s'annu 2021 cun una versione noa de ReactOS, publicada su 16 de su mese de idas. De ReactOS amus giai chistionadu cando nd'ant publicadu sa versione passada: est unu sistema operativu lìberu in isvilupu chi punnat a èssere de s'in totu cumpatìbile cun Microsoft Windows.

Sa tarea de is isvilupadores no est fàtzile: Windows est unu sistema complicadu e propietàriu e duncas no ischimus meda de comente est fatu a intro. Una de is pagas noas positiva de is ùrtimos annos est chi, comente Microsoft at abbandonadu Windows Phone, ReactOS non bolet adatadu a is telefoneddos puru. Su progetu retzit un'agiudu pretziosu dae un'àteru, Wine, chi punnat a donare sa possibilidade de esecutare programmas pro Windows me is sistemas Linux/Unix.

Cun sa versione 0.4.14, ReactOS abarrat in s'istadu alpha. Bolet nàrrere chi no est prontu pro s'impreu de ònnia die, ma est bastante istàbile de dda pòdere proare.

Is noas de importu sunt:

• funtziones noas pro s'interfache de su sistema, comente "Imbia a" e "Bae a su tretu de s'archìviu";
• cumpatibilidade cun is elaboradores NEC PC-9800;
• megioradas de su suportu pro sa retze, prus che totu pro su protocollu ICMP e su pilota NetKVM VirtIO;
• megioradas pro su nùcleu (kernel), sa parte de su sistema chi manìgiat is cumponentes eletrònicos de su sistema.

Apo fatu sa sòlita proa cun Virtualbox e sa diferèntzia, pro cantu pertocat un'impreu de base, no est manna. Unos cantos programmas in su manigiadore de is aplicatziones, comente Firefox, sunt betzos e sa tentada de installare versiones noas iscarrighende·ddas dae is giassos ofitziales no at funtzionadu, forsis pro ite ca impreant funtziones de Windows chi no esistint ancora in ReactOS/Wine. Ma in generale, is programmas chi ddoe sunt funtzionant bene, mancari su sistema essat prus pagu istàbile a pustis de càncua ora de impreu.