Est a disponimentu su Fairphone 4

Fairphone at annuntziadu cun unu messàgiu de posta eletrònica s'arribu de sa versione 4 de su telefoneddu suo.
Fairphone est su progetu pro unu telefoneddu giustu e solidale, nàschidu in su 2013. Is telefoneddos Farphone sunt fatos paghende su cumpensu giustu a totu is traballadores, tenende in cunsideru is problemas de incuinamentu e càmbiu climàticu e faghende a manera chi su telefoneddu si potzat arrangiare ponende a disponimentu is biculeddos de cambiare.

Is piessìnnios tècnicos de custa versione noa sunt:

• Mannesa: 162 x 75,5 x 10,5 mm
• Pesu: 225g
• Protzessore: Octa-core (2x2.2 GHz Kryo 570 & 6x1.8 GHz Kryo 570)
• Protzessore gràficu: Adreno 619
• Memòria RAM: 6/8 GB
• Archìviu internu: 128GB/256GB
• Visore: IPS LCD 6,3" 1080 x 2340 px, raportu 19.5:9 (~409 ppi de densidade)
• Retzes: GSM, HSPA, LTE, 5G
• Connetividade: Wi-Fi 802.11 a/b/g/n/ac, Wi-Fi Direct, Bluetooth 5.1, USB Type-C 3.0, USB On-The-Go, DisplayPort, NFC
• Bateria: Li-Ion 3905 mAh (chi faghet a cambiare)
• Sistema: Android 11 (chi s'at a pòdere cambiare cun àteru)
• Dòpia SIM: eja, is duas cun 5G ativu
• Memòria micro-sd: eja
• Garantzia: 5 annos

Is piessinnios sunt bonos pro unu telefoneddu chi at a pòdere durare pro carchi annu, permitende puru de dd'arrangiare si acontesset unu guastu o un'intzidente chi nd'arroghet calicuna parte. Pro immoe si podet pre-ordinare in su situ web pro 579€ + costos de imbiu.
Pro cantu tocat s'esperièntzia de impreu, nos tocat a si fidare de su chi ant iscritu unos cantos sitos web ispetzializados, comente Techradar, chi dd'at descritu comente unu telefoneddu bonu de categoria mèdia e nd'at bantadu s'eco-sustenibilidade, sa possibilidade de dd'arrangiare in domo e sa garantzia longa. Pro contras, at sinnaladu chi su letore de imprentas digitales montadu in unu ladu est prus complicadu de impreare, cumparadu cun àteros telefoneddos, e calicunu problema de lentesa chi mancari s'ant a risòlvere cun is annoamentos de is programmas.

Pro prus informatziones, https://www.fairphone.com/

S'immàgine est de propiedade de Fairphone