Est a disponimentu su Fairphone 4

Fairphone at annuntziau cun unu messàgiu de posta eletrònica s'arribu de sa versioni 4 de su telefoneddu suu.
Fairphone est su progetu po unu telefoneddu giustu e solidali, nàsciu in su 2013. Is telefoneddus Farphone funt fatus paghendi su cumpensu giustu a totu is traballadoris, tenendi in cunsideru is problemas de incuinamentu e càmbiu climàticu e faendi a manera chi su telefoneddu si potzat arrangiai ponendi a disponimentu is incueddus de cambiai.

Is piessìnnius tènnicus de custa versioni noa funt:

• Mannesa: 162 x 75,5 x 10,5 mm
• Pesu: 225g
• Processori: Octa-core (2x2.2 GHz Kryo 570 & 6x1.8 GHz Kryo 570)
• Processori gràficu: Adreno 619
• Memòria RAM: 6/8 GB
• Archìviu internu: 128GB/256GB
• Visori: IPS LCD 6,3" 1080 x 2340 px, raportu 19.5:9 (~409 ppi de densidadi)
• Arretzas: GSM, HSPA, LTE, 5G
• Connetividadi: Wi-Fi 802.11 a/b/g/n/ac, Wi-Fi Direct, Bluetooth 5.1, USB Type-C 3.0, USB On-The-Go, DisplayPort, NFC
• Bateria: Li-Ion 3905 mAh (chi fait a cambiai)
• Sistema: Android 11 (chi s'at a podi cambiai cun àteru)
• Dòpia SIM: eja, is duas cun 5G ativu
• Memòria micro-sd: eja
• Garantzia: 5 annus

Is piessinnius funt bonus po unu telefoneddu chi at a podi durai po cancu annu, permitendi puru de dd'arrangiai si acuntessit unu guastu o un'incidenti chi nd'arroghit calincuna parti. Po imoi si podit pre-ordinai in su situ web po 579€ + costus de imbiu.
Po cantu tocat s'esperièntzia de impreu, nosi tocat a si fidai de su chi ant scritu unus cantu situs web spetzializaus, comenti Techradar, chi dd'at descritu comenti unu telefoneddu bonu de categoria mèdia e nd'at bantau s'eco-sustenibilidadi, sa possibilidadi de dd'arrangiai in domu e sa garantzia longa. Po contras, at sinnalau chi su letori de imprentas digitalis montau in unu ladu est prus cumplicau de impreai, cumparau cun àterus telefoneddus, e calincunu problema de lentesa chi mancai s'ant a arresolvi cun is annoamentus de is programas.

Po prus informatzionis, https://www.fairphone.com/

Sa màgini est de propiedadi de Fairphone