Traschia Twitter contras a sa guardiania biomètrica

Regordades sa campànnia "Torra a ti pigare sa fache" contras a sa guardiania biomètrica?
Sa chèscia paghiosa contras a custa violatzione de sa privatesa sighit e pedit oe de incumentzare una Traschia Twitter (narant issos Twitter Storm) cun s'ocasione de un'addòbiu de su Cussìgiu de Tecnologia e Cummèrtziu (Technology and Trade Council).

Unu de is argumentos de custu cussìgiu, narat su tzentru Hermes pro sa Trasparèntzia e is Deretos Umanos Digitales, est sa creatzione de "ainas comunas pro mesurare e avalorare s'impreu de s'identificatzione biomètrica, incluidu su connoschimentu de fache".
Sa risposta de sa campànnia est chi "no nche podent èssere ainas pro una cosa chi no diat dèpere esistere" e pedit de manifestare sa contrariedade a custas ainas, imbiende unu Tweet a sa Cummissària Europea Margrethe Vestager e sa Segretària a su Cummèrtziu pro is Istados Unidos Gina Raimondo. Ambas ant chistionadu contras a sa guardiania biomètrica su làmpadas passadu.

Su Tweet podet èssere imbiadu a manera automàtica sighende custu ligòngiu.

Agatades àteras informatziones a pitzus de sa campànnia in su situ ufitziale.