Est ofitziale: Windows 11 arribat a fine 2021

Una pariga de dies a oe bos apo contadu de is narìngios chi Microsoft fiat giai pro annuntziare s'arribu de Windows 11. Custos contos fiant beros. Difatis, immoe ischimus chi Windows 11 at a essire a s'agabbu de su 2011/incumentzu de 2022. Andamus a bìdere is prus noas de importu.

1. A primu, su menù de aviu at a èssere in su tzentru de sa barra de is protzessos comente aìamus bidu me is immàgines publicadas de unos cantos sitos.
2. Is annoamentos ant a èssere prus lèbios e ant a èssere installados in su fundu, sena bòlere un'aviu nou de su sistema. Si mi permitides de brullare unu pagheddu, Microsoft a sa fine at detzìdidu de ascurtare totu is frastimos chi ddis amus ghetadu me is annos passados.
3. Torrant is widget, cussos programmeddos de agiùnghere a s'iscrivania pro funtziones comente meteo, noas e informatziones de sistema.
4. At a èssere megiorada sa butega de is programmas, Microsoft Store, chi at a donare prus seberos a is isvilupadores pro bèndere is aplicatziones issoro.
5. S'ant a pòdere impreare a manera fàtzile is app pro Android.
6. A ùrtimu ma de importu, s'annoamentu dae Windows 10 a 11 s'at a pòdere fàghere in donu comente dae 7 e 8.x a 10.

Windows 11 at a bòlere unu microprotzessore cun mìnimu 1Ghz de frecuèntzia e 2 o prus nùcleos (core), 64GB de discu fissu e 4GB de RAM. No sunt netzessidades artas, cunsideradu chi in su passadu si nde pesaiant pro ònnia versione. Paret chi mancari a Microsoft no serbat prus a apoderare su sistema lèbiu pro ddu fàghere funtzionare me is telefoneddos (pro su chi ischimus), apat detzìdidu comente e chi siat de no repìtere sa pròpiu faddina de Windows Vista.