Microsoft si preparat a publicare Windows 11?

S'est chistionende meda in is ùrtimos dies de s'annùntziu de una versione noa de Windows chi Microsoft diat dèpere fàghere su 24 de làmpadas. No s'ischit meda e segundu unos cantos narìngios no ddoe at a èssere una versione noa, ma un'annoamentu mannu de Windows 10, chi dd'ant a nàrrere Windows 10 Sun Valley, sighende s'istile de Mac OS X pro is nòmines de sistema e pighende elementos de un'àtera versione cantzellada de Windows, sa 10X. Comente e chi siat, The Verge at publicadu un'artìculu chi ammustrat unas cantas immàgines de Windows 11 chi parent cunfirmende chi Microsoft siat acanta de dd'annuntziare.

Sunt giai passados ses annos dae sa publicatzione de Windows 10, unu de is mègius sistemas de Microsoft fintzas a immoe in pari cun Windows XP chi fiat duradu unos 5 annos in antis de s'arribu de Windows Vista, unu de is peus essidos. Fintzas is duas versiones in antis de sa 10, sa 8 e sa 8.1, no sunt pràghidas meda a su pùblicu e pariant fatas cun sa presse de essire cun unu sistema chi poderet funtzionare in is telefoneddos e tauleddas, ponende·si in cumpetitzione cun Android e iOS. Windows 10 fiat su cumpletamentu de custu tretu concas a un'ecosistema chi depiat pònnere in pari dispositivos mòbiles e computadores clàssicos: s'agabbu de un'època e s'incumentzu de una noa.

Cun su fallimentu de Windows Phone/Mobile, Microsoft at amarolla dèpidu cambiare is pranos suos, torrende a si cuntzentrare asuba de is computadores e sa lìnia sua de tauleddas, Surface. Su pagu chi ischimus in contu de Windows 11, si Microsoft no nos at reservadu calicunu ispantu pro s'annùntziu, sighit custa lìnia, parende prus un'annoamentu de Windows 10 chi no unu sistema de su totu nou. Custas difatis sunt is prus noas de importu, segundu su chi si narat in su web:

• unu menù de aviu (Start) simplificadu, sena is Live Tiles de Windows 10. Is iconas de su menù e de is aplicatziones no sunt prus alliniadas a manu manca in sa barra de is protzessos, ma postas in su tzentru. Po cantu nd'ischimus, at a èssere possìbile a torrare a coa a sa bisura chi su menù e is iconas tenent oe;
• una versione noa de is Widgets, cussos programmeddos chi si podiant agiùnghere a s'iscrivania de Windows 7 e chi sunt a pustis istados abbandonados;
• megioramentos de s'interfache, cun sa possibilidade de mòere e ordinare is ventanas abertas cun s'impreu de controllos noos;
• una butega (Store) noa pro donare possibilidades noas a is isvilupadores de bèndere is aplicatziones issoro a intro de su sistema;
• aplicatzione pro s'Xbox integrada in su sistema cun megioramentos de s'esperièntzia de impreu;
• mègius manìgiu de is resursas e prus che totu de su protzessore gràficu (GPU).

Abarramus abetende s'annùntziu de Microsoft pro nd'ischìere de prus e mancari de pòdere proare Windows 11 in una versione beta comente est acontèssidu cun sa 8 e sa 10.

S'immàgine de s'artìculu est pigada dae su situ Tieba Baidu.