Su fogu at firmadu unu servìtziu mannu de "cloud"

Su fogu at firmadu unu servìtziu mannu de "cloud"

Màgini de su fogu, pigada de su profilu Twitter de is pompieris de Strasburgo

In su note intre su 9 e su 10 de martzu in Strasburgo su fogu at fatu dannu a unu tzentru de datos de unu de is prus frunidores mannos de servìtzios de informàtica in sa nue (cloud computing). S'efetu de custu disacatu est chi unos cantos servìtzios e giassos web non sunt a disponimentu in custas ùrtimas dies. Custu pro ite ca su fogu at ispèrdidu una parte de is elaboradores e is tècnicos ant dèpidu istudare totu is àteros.

Pro sorte, in su fogu nemos s'est ingortu, ma s'azienda mere de su tzentru isciusciadu dae su fogu a mericeddu de su 10 martzu no at pòdidu nàrrere ancora cantos datos non s'ant a pòdere recuperare una borta torrada a istrantargiare sa retze.
Unu de is sitos chi in su momentu chi semus iscriende custu artìculu no est ancora a disponimentu pro neghe de su fogu est su diàriu in limba sarda Bideas.org.

Est de interessu chi is servìtzios "cloud" sunt presentados a fitianu che seguros e fidados fintzas in situatziones de guastu o de disacatu. S'azienda frunidora, Ovh, tenet àteros tzentros de datos in 19 paisos ma a cantu paret non ddos impreat pro istantargiare solutziones de repetidura chi permitant de sighire a frunire su servìtziu a totu is clientes cando unu de is tzentros non funtzionat.

No est, a nàrrere sa beridade, sa prima borta chi una cosa de aici acontesset pro motivos prus pagu graes de unu fogu chi isciùsciat unu tzentru de elaboratzione. Podimus pro esempru regodaere su guastu de Google de su mese de idas 2020: pro neghe de su sistema de autenticatzione chi fiat a foras de lìnia, no est istadu possìbile a impreare perunu servìtziu issoro pro un'ora; in su mangianu de su 29 abrile 2018 ddi fiat tocadu a Telegram de no èssere a disponimentu pro una farta de eletritzidade. Totu custu regordat una fràsia famada de su mundu de s'informàtica: "there is no cloud. It's just someone else's computer" / "Non ddoe at nissuna nue. Est isceti s'elaboradore de àteros".

(Immàgine in artu pigada dae su profilu de is pompieris de Strasburgo)

Cummenta

Categorias