Sunt arribbadas is vìdeu-tzerriadas pro Telegram

Fiat ora! - at a àere pensadu calicunu. Telegram siat annuntziadu de traballare a is vìdeu-tzerriadas in su 2017 e mancari in antis puru, cando fiat un'aplicatzione pro messàgios de testu isceti. Is tzerriadas sunt arribbadas in su martzu 2017 e amus abetadu àteros 3 annos pro su vìdeu, chi immoe est a disponimentu pro dispositivos Android e iOS, mancari ancora in versione alpha e duncas cun sa possibilidade chi ddoe siant problemas in s'impreu de custa funtzione noa. Sa resone pro dd'àere introdùida chitzi, sena abetare de nde tènnere una versione istàbile est forsis sa gana de festare is 7 annos de s'aplicatzione cun custu annùntziu de importu.

Pro ativare su vìdeu depemus isceti incumentzare una mutida normale e a pustis tocare su butone "Video" in s'ischermu pro ativare sa telecàmera. Sa ventanedda de su vìdeu podet èssere impiticada pro sighire a traballare cun su dispositivu fintzas in s'ìnteri de s'arresonu. Sa comunicatzione intra is dispositivos est codificada pro nd'assegurare sa privatesa. Podimus averiguare chi sa codìfica siat funtzionende comente pro is tzarradas clàssicas, assegurende·si chi is pròpiu bator magineddas aparessant a susu in s'ischermu de is duos dispositivos.

Cun custa noa, Telegram si ponet in su pròpiu livellu de is cuncurrentes. A nàrrere sa veridade, Telegram teniat giai funtziones meda chi is àteras non tenent o chi ant postu in òpera prus tardu, ma is vìdeu-tzerriadas sunt de importu mannu pro usuàrios meda e duncas non podiant mancare. Is isvilupadores ant giai annuntziadu chi ant a arribbare a curtzu fintzas is vìdeu-tzerriadas pro is grupos.