OnlyFans bolet bandire sa pornografia

OnlyFans est una prataforma chi permitit a is impitadores suos de carrigare fotografias, vìdeos e àteros cuntènnidos e de ddos ofèrrere a pagamentu a is istimadores (is fans). Est essida famada pro ite ca unas cantas modellas dda impreant pro bèndere immàgines de is corpus issoro, màgines chi bortas medas figurant iscenas pornogràficas.
OnlyFans at annuntziadu chi custu no at a èssere prus permìtidu a incumentzare dae su mese de ledàmine 2021.

Is resones de custa detzisione paret chi siant diferentes. A primu, Apple, Google e Instagram nd'ant blocadu s'integratzione cun is prataformas issoro. No est possìbile pro esempru a installare s'app de OnlyFans in is telefoneddos impreende is butegas de iOS e Android.

Su prus eventu de importu, però, est sa minetza de Mastercard de blocare is pagamentos cun is tèsseras suas, comente risposta a sa pressione de grupos contràrios a su traballu sessuale. A sa pròpiu pressione at giai dèpidu rispòndere PornHub, prataforma famada de vìdeos pornogràficos, permitende isceti a is impitadores averiguados de carrigare cuntènnidos. Is resones de custas pressiones sunt diferentes segundu su grupu: religiosas, èticas, e prus che totu, ligadas a sa gherra a is abusos, giai chi in is ùrtimos annos est acontèssidu prus bortas de iscobèrrere chi vìdeos chi giraiant in Internet fiant resurtadu de violèntzias o porno-vengàntzias.

Sa detzisione de OnlyFans de seguru at a pesare calicuna cuntierra. A primu, at a tocare a resonare, comente apo naradu prus de una borta, a pitzus de su podere de is prataformas, a incumentzare dae is produtores de is sistemas operativos pro arribare a is sotziedades de is pagamentos, giai chi in is ùrtimos annos sa minetza de blocos e bandos ant controlladu meda is informatziones e is cuntènnidos in sa retze, controllu chi no diat a èssere tarea de sotziedades privadas. Un'àteru argumentu est sa possibilidade pro is traballadores sessuales de sighire a traballare in forma legale. Unos cantos faeddos de interessu a pitzus de custu argumentu ddos at regortu Wired in s'artìculu suo.