Oe est sa die de su Cyber Polygon: ite acontesset?

Oe est sa die de su Cyber Polygon: ite acontesset?

Màgini de ItNeverEnds pigada de Pixabay

Intèndidu dd'aiais? Pàginas medas ant chistionadu de su chi diat a acontèssere oe chi incumentzat su Cyber Polygon. Medas de issas nd'ant chistionadu comente chi guvernos e cumpangias mannas esserent preparende·si a un'atacu informàticu a livellu mundiale. Dd'ant tzerriadu su "Reset Mannu". Non bos apensamentade: no est beru.

Su chi acontesset oi est un'eventu chi ddi narant Cyber Polygon e no est una cosa fata a iscùsia, giai chi ddoe at fintzas su giassu web. Est unu cunvènniu pro s'isvilupu de tècnicas de seguràntzia informàtica. In s'ìnteri de custu cunvènniu ddoe at èssere una parte pràtica, su "Annestru Tècnicu" (Technical Training). Est una faina de interessu: ddoe at duas iscuadras, una ruja fata de is organizadores chi at a simulare un'atacu informàticu contra a s'àtera, s'iscuadra asula, chi depet organizare sa defensa. Si tratat duncas de una proa a intro de una retze privada, istantargiada pro custu annestru, e non de un'atacu pro pònnere in perìgulu sa seguràntzia de sa retze mundiale, nen de s'idea, ancora prus fantasiosa, de incumentzare una "tziber-pandemia", comente at naradu calicunu.

Sa resone pro organizare un'acuntessimentu (unu de is medas chi si faghent) ònnia annu pro resonare a pitzus de seguràntzia informàtica, cun proas pràticas puru, diat a dèpere èssere crara: oe in die sa retze Internet ligat totu is atividades umanas e un'atacu beru diat arriscare de firmare totu, incumentzende de is messàgios chi imbiamus ònnia mangianu a is persones chi istimamus a is iscàmbios econòmicos. Est duncas de importu mannu a iscobèrrere sa debilesa de is sistemas e a ddos megiorare pro s'assegurare siat chi custos atacos siant difìtziles, siat chi sa retze siat bona a aguantare is dannos e sighire a funtzionare in s'ìnteri chi is partes isciusciadas siant torradas a istantargiare.

Mancari giassos medas apant contadu de sa menatza de su "Reset Mannu" e de proas tècnicas de tziber-atacu, mi paret chi a su mancu custa borta sa contàntzia apat giradu prus che totu a intro de is grupos cumplotistas, sena atzicare a gente meda comente est acontèssidu in àteras ocasiones. Forsis s'umanidade est imparende a ischerare is noas beras de is farsidades allarmistas?

Cummenta

Categorias