No, IT Wallet NO imbiat is datos a is Istados Unidos

Chirchende prus informatziones in contu de IT Wallet e cummentos de chie dd'est isperimentende apo agatadu unos cantu grupos chi sunt ispainende un'oriolu mannu: IT Wallet imbiat is datos tuos a is Istados Unidos. Diat a èssere grae, ca su Regulamentu Generale pro s'Amparu de is Datos de s'Unione Europea proibit de memorizare datos de is impitadores in serbidores chi non siant in s'Unione, ma non si depimus apensamentare pro custu, ca tantu sa noa si fundat a subra de una faddina manna, chi immoe bos isprico.

Totu naschet dae su fatu de chi s'app IO, s'aplicatzione pro telefoneddu chi serbit a impreare IT Wallet, su còdighe de orìgine est lìberu e duncas a disponimentu de totus. Calicunu at pensadu de lèghere custu còdighe e at agatadu una cunfiguratzione de interessu, chi narat

"locale": "en-US"

e comente ant bidu "US" ant pensadu chi duncas s'app imbiet is datos a s'Amèrica. Est unu resonamentu aici meda tontu chi paret òpera de unu troll, ma intertantu calicunu si ddu creet.

In un'app, su "locale" est cudda parte de sa cunfiguratzione chi narat comente s'impitadore depet bìdere is datos: sa lìngua, is unidades de mesura, sa forma de is nùmeros (pro esempru 1,5 o 1.5, segundu su paisu). en-US s'impreat pro nàrrere chi s'app depet impreare s'inglesu de is Istados Unidos e totu is unidades de in cue (Fahrenheit imbetzes de Celsius, inches imbetzes de tzentìmetros, etc). Sigomente s'app IO est a disponimentu siat in italianu siat in inglesu est craru chi esistit una localizadura en-* (calicunu preferit en-GB cun formas britànnicas, ma custu dipendet de is isvilupadores).

Duncas, intra is resones chi si podent tènnere pro no impreare IT Wallet, custa de seguru no est bàlida e arriscat de nde bogare credibilidade a chie totu nde tenet prus bonas, comente est acuntèssidu cun totu is iscimpròrios chi giraiant in contu de su 5G.