No, IT Wallet NO imbiat is datus a is Stadus Aunius

Circhendi prus informatzionis in contu de IT Wallet e cumentus de chini dd'est sperimentendi apu agatau unus cantu grupus chi funt spainendi un'oriolu mannu: IT Wallet imbiat is datus tuus a is Stadus Aunius. Iat a essi grai, ca su Regolamentu Generali po s'Amparu de is Datus de s'Unioni Europea proibit de memorizai datus de is impitadoris in serbidoris chi no siant in s'Unioni, ma no si depeus apensamentai po custu, ca tanti sa noa si fundat asuba de una faddina manna, chi imoi si spricu.

Totu nascit de su fatu de chi s'app IO, s'aplicatzioni po telefoneddu chi serbit a impreai IT Wallet, su còdixi de orìgini est lìberu e duncas a disponimentu de totus. Calincunu at pensau de ligi custu còdixi e at agatau una cunfiguratzioni de interessu, chi narat

"locale": "en-US"

e comenti ant biu "US" ant pensau chi duncas s'app imbiit is datus a s'Amèrica. Est un'arraxonamentu aici meda tontu chi parit òpera de unu troll, ma intertantu calincunu si-ddu creit.

In un'app, su "locale" est cudda parti de sa cunfiguratzioni chi narat comenti s'impitadori depit biri is datus: sa lìngua, is unidadis de mesura, sa forma de is nùmerus (po esempru 1,5 o 1.5, segundu su paisu). en-US s'impreat po nai chi s'app depit impreai s'inglesu de is Stadus Aunius e totu is unidadis de inguni (Fahrenheit invecis de Celsius, inches invecis de centìmetrus, etc). Sigomenti s'app IO est a disponimentu siat in italianu siat in inglesu est craru chi esistit una localizadura en-* (calincunu preferit en-GB cun formas britànnicas, ma custu dipendit de is svilupadoris).

Duncas, intra is arraxonis chi si podint tenni po no impreai IT Wallet, custa de seguru no est bàlida e arriscat de ndi bogai credibilidadi a chini totu ndi tenit prus bonas, comenti est acuntèssiu cun totu is scimpròrius chi girànt in contu de su 5G.