Skype serrat!

Forsis is prus giòvanos non dd'aiant mancu mai intèndida, ma Skype, app chi permitit de iscambiare messàgios e tzerriadas (tipu Whatsapp, Telegram, etc), est istada de importu mannu pro gente meda me is annos 2000 e sa prima parte de is 2010. Est istada difatis una de is primas, e sa prus arrannèscia in giru de is annos 2010, chi permitiant de telefonare a traessu de Internet impreende unu PC e, a pustis, unu telefoneddu. Microsoft at comunicadu chi dd'at a serrare ocannu, 2025, in maju.

In s'incumentzu Skype fiat simpre meda: si podiat tzerriare a un'àteru impitadore de Skype a in donu opuru, paghende, una lìnia telefònica. Fintzas de aici, pariat un'ispantu, ca is video-tzerriadas cun sa lìnia telefònica clàssica fiant caras meda e àteras aplicatziones permitiant sa videochat, ma si trataiat isceti de una tzarra de testu cun possibilidade de si bìdere in vìdeu, cosa chi forsis oe faghet a arrìere a ddu pensare. Fadiat a imbiare messàgios de testu, ma isceti si s'àteru impitadore teniat s'aplicatzione aberta. Cosa de importu, fiat un'app multiprataforma, est a nàrrere chi funtzionaiat in prus sistemas operativos, duncas fintzas is impitadores de Linux dda podiant impreare. Cun su tempus s'est fata prus sofisticada, simigende a totu is àteras app de messageria istantànea chi connoschimus. Microsoft si dd'est comporada in su 2011 e in su 2013 at serradu Live Messenger, àtera app chi amus istimadu meda in antis de Facebook e Whatsapp, pro si cuntzentrare a subra de Skype isceti. Comente si siat, pro s'impreu professionale, Microsoft at giai cambiadu Skype For Business cun Teams una pariga de annos a oe e pro cantu pertocat is àteros impitadores, est craru chi preferint a impreare Telegram, Whatsapp e àteras. Mancu s'integratzione de Copilot, s'inteligèntzia artifitziale de Microsoft, nd'at megioradu sa sorte.

Is chi ancora impreant Skype tenent tempus finas a su 5 de maju de su 2025, ca a pustis no at a funtzionare prus.