Si-ndi chistionat de diora meda, ma a sa fini su Cunsillu de s'Unioni Europea at aprovau unu formau universali po is càrriga-baterias de telefoneddus, tauleddas, computeras portàtilis e àterus dispositivus.
Apple megat de agiungi una funtzioni noa po permiti una protetzioni in prus de su dispositivu: sa modalidadi de inserru (Lockdown Mode, in s'annùntziu originali). Custa modalidadi nascit po gherrai contra a atacus de programas malus che Pegasus, unu programa-spia svilupau de s'asienda israeliana NSO group e impreau po scocai e scoviai informatzionis de ativistas po is deretus umanus, giornalistas e personàgius polìticus. Su nòmini est unu riferimentu craru a sa cuarantena chi eus bìviu totus in s'interis de su primu annu de pandemia de COVID-19. Si custa siat una bella idea o un'esercìtziu de gustu malu, ddu lassu decidi a bosàterus.
Si-ddus arregordais is telefoneddus BlackBerry? Annus a oi ant fatu sa stòria de is telefoneddus intelligentis, bessendi famaus in cussu setori cun is mòllius insoru, chi ant sighiu a portai una tastera fìsica impari cun su schermu a tocu. Abellu abellu, is BlackBerry ant tentu sèmpiri prus pagu sorti, acabendi cun sa noa chi cras at a essi studada dessintotu s'arretza chi permitit a is dispositivus cun su sistema BlackBerryOS de funtzionai.
S'agentzia italiana Altroconsumo at preparau un'atzioni colletiva contras de Apple cun s'acusa de ai programau s'obsolescèntzia de is baterias de is iPhone 6, 6 Plus, 6S e 6S Plus, agiumai 1 millioni de unidadis bèndias intra su 2014 e su 2020.
