Una scheda vìdeu impreada po imbiai datus

Duus circadoris de sa socedadi Duo ant realizau una manera spantosa po trasmiti datus de un'elaboradori chena connessioni de retza.
Sa scheda vìdeu po sincronizai s'unidadi de elaboratzioni gràfica, sa memòria RAM sua e is atrus cumponentis tenit unu sinnali digitali de relògiu. Custa tènnica de trasmissioni impreat custu sinnali po fai arribai is datus a foras de s'aposentu innui s'agatat s'elaboradori.

Su sinnali de relògiu po carchi mollu de scheda, si podit regulai po mèdiu de istrutzionis de programa. Is circadoris ant programau unu càmbiu de frecuèntzia chi at generau unu sinnali arràdiu chi podiat essi retziu cun unu dispositivu de arràdiu definida de programma (SDR, Software-defined radio) collegada a sa genna USB de un'atru elaboradori. Variatzionis de custu sinnali podint essi impreadas po codificai is datus de imbiai.

Custa tènnica, chi parit bessida de una pellìcula de spias, podit essi impreada po furai datus de elaboradoris chena connessioni a Internet, ma no est fàcili de ponni in òpera poita ca arrecherit un'acessu (fìsicu o a tesu cun sa retza) po installai su programa modificau de manìgiu de sa scheda vìdeu.

Abarrat perou un'idea chi a nemus ddi fiat bènnia in conca fintzas imoi e chi mancai in s'imbenidori si diat podi permiti de imbiai datus sfrutendi su fenòmenu de interferèntzia (o infirchidura) de frecuèntzias arràdiu de is dispositivus eletrònicus, chi est cunsiderau un'efetu negativu, mancai normale, ma chi podit essi firmau chena dificultadi cun sa schermadura de is aparatus.

Si imbiu a s'artìculu originali po ndi sciri de prus.