Un'ischeda vìdeu impreada pro imbiare datos

Duos chircadores de sa sotziedade Duo ant realizadu una manera ispantosa pro trasmìtere datos dae un'elaboradore sena connessione de retze.
S'ischeda vìdeu pro sincronizare s'unidade de elaboratzione gràfica, sa memòria RAM sua e is àteros cumponentes tenet unu sinnale digitale de rellògiu. Custa tècnica de trasmissione impreat custu sinnale pro fàghere arribare is datos a foras de s'aposentu in ue s'agatat s'elaboradore.

Su sinnale de rellògiu pro carchi mollu de ischeda, si podet regulare pro mèdiu de istrutziones de programma. Is chircadores ant programmadu unu càmbiu de frecuèntzia chi at generadu unu sinnale ràdiu chi podiat èssere retzidu cun unu dispositivu de ràdiu definida dae programma (SDR, Software-defined radio) collegada a sa ghenna USB de un'àteru elaboradore. Variatziones de custu sinnale podent èssere impreadas pro codificare is datos de imbiare.

Custa tècnica, chi paret essida dae una pellìcula de ispias, podet èssere impreada pro furare datos dae elaboradores sena connessione a Internet, ma no est fàtzile de pònnere in òpera pro ite ca recheret un'atzessu (fìsicu o a tesu cun sa retze) pro installare su programma modificadu de manìgiu de s'ischeda vìdeu.

Abarrat però un'idea chi a nemos ddi fiat bènnida in conca fintzas immoe e chi mancari in su benidore nos diat pòdere permìtere de imbiare datos isfrutende su fenòmenu de interferèntzia (o infrichidura) de frecuèntzias ràdiu dae is dispositivos eletrònicos, chi est cunsideradu un'efetu negativu, mancari normale, ma chi podet èssere firmadu sena dificultade cun s'ischermadura de is aparatos.

Bos imbiu a s'artìculu originale pro nd'ischire de prus.