Un'atru progetu chi agiudat sa circa mèiga

Eus giai chistionau de unu progetu chi at agiudau e agiudat a buscai una cura o unu vacinu po custu coronavirus chi s'at obligau a abarrai in domu po no s'amobadiai. Esistit un'atru progetu de càrculu distribuiu chi est donendi un'agiudu mannu e at atirau medas voluntàrius.

A custu progetu ddi nant Folding@home e at publicau una pàgina innui amostrat sa circa sua.
Contribuiri a custu progetu est fàcili meda. No impreat BOINC cumenti Rosetta@home, ma sa manera de ddu installai e esecutai no càmbiat meda. In custu momentu, est a disponimentu sceti po elaboradoris, ma unu programa clienti po telefoneddus at a torrai in s'imbenidori. 

Totu su chi depeis fai est a ddu scarrigai in s'elaboradori, sceberendi su sistema operativu bostu, e dd'installai.
Chi boleis, podeis creai unu contu, ma si podit contribuiri fintzas cumenti a impitadoris anònimus. Sa fotografia a bàsciu amostrat su programa principali. Candu su stadu (status) in su pannellu a manu manca est "Online" no depeis fai atru: su programa at a scarrigai is unidadis de traballu e ddas at a elaborai a manera automàtica. Candu is arresurtaus funt prontus e s'elaboradori est connètiu a Internet, ant a essi imbiaus a su serbidori de Folding@Home. De sòlitu no nc'est bisòngiu, ma si bideis "Paused" cumenti in sa fotografia (a manu manca, cun fundu grogu), depeis fai clic asuba a "Fold" po incumentzai su càrculu.