Sa lei de El Salvador at a connosci su Bitcoin

El Salvador, cun una lei de su mesi de làmpadas passau at donau balori legali a su Bitcoin. Su paisu de su centru-Amèrica, primu in su mundu a connosci po lei su cripto-dinai, est andendi ainnantis cun custu progetu, preparendi-si, de su 7 de cabudanni, a ponni duxentus càscias automàticas po permiti de cambiai is dòllarus in Bitcoin e a s'imbressi.

S'idea, segundu is decraratzionis de su guvernu, at a permiti a is tzitadinus de aorrai prus de cuatruxentus millionis de dòllarus po is trasferimentus de dinai de s'èsteru, sendi chi su 20% de su prodotu internu brutu de su paisu benit de su dinai imbiau de is traballadoris emigraus. Totu is trasferimentus traditzionalis difatis tenint unas cantu cumissionis de pagai po s'operatzioni, mentris su guvernu at fatu un'acòrdiu po impreai sa prataforma Strike po is transatzionis cun Bitcoin. Cun custa s'at a podi creai portafòllius digitalis po allogai e spendi su cripto-dinai.

Si custa siat una noa bona o mala, difìcili est a ddu nai chena una basi de economia, ma cunsillu de ligi custu artìculu de Sardunomics po ndi cumprendi de prus.