Firefox: comenti ativai is grupus de schedas

Sa possibilidadi de agrupai is schedas in unu navigadori esistit giai in Chromium e derivaus (Google Chrome, Opera, Vivaldi, etc), mentris amancat ancora in Firefox. In manera ofitziali, assumancu. Esistint difatis de diora estensionis chi permitint de agiungi custa funtzioni e un'annu a oi prus o mancu si fueddàt giai de unu suportu nadiu, chi impitadoris medas domandànt. Custu suportu imoi esistit, ma est ancora unu sperimentu e duncas est cuau comenti a cunfiguratzioni predefinida. Innoi si spricu comenti si fait a dd'ativai.

Po incumentzai depeis aberri Firefox po computadoras e ponni s'indiritzu "about:config". In sa pàgina chi cumparit ddoi est una barra de circa. Scriei "browser.tabs.groups.enabled". Sa pàgina s'at a amostai una lìnia, cun balori false: cambiai custu a true e serrai sa pàgina.

A custu puntu bastat a fai clic cun su tastu de dereta in una scheda calisisiat  e sceberai "Agiunghe ischeda a unu grupu nou". Eis a tenni sa possibilidadi de sceberai unu colori e unu nòmini po connosci su grupu. At a essi possìbili a agiungi schedas a su grupu chi esistit o a ndi creai àterus; fait a arredusi su grupu faendi clic asuba a s'eticheta, aici is schedas ant a essi cuadas po mantenni sa ventana ordinada.

Impari cun sa possibilidadi de creai "cuntenidoris", custa funtzioni noa permitit duncas de traballai in manera prus neta a chini totu acostumat a aberri dexinas de schedas. Est giai a disponimentu in sardu gràtzias a su traballu de Sardware e at a essi ativa in manera ofitziali in una de is versionis benidoras de Firefox, no scieus cali, ma fait giai a incumentzai a dda impreai comenti eus biu. Una cosa no est ancora crara: si custa funtzioni at a esisti puru in Firefox Mobile, sa versioni po telefoneddu e tablet. A dolu mannu sa pàgina about:config no dd'ant ancora torrada a custus dispositivus, duncas no fait a averiguai.