Sa petitzione contras a sa guardiania biomètrica

"In totu s'Europa is fortzas de politzia, autoridades locales e aziendas privadas sunt isparghinende a s'iscùsia tecnologias isperimentales e forrogadoras chi sighint, analizant e mudant a ogetos is faches nostras e is corpus nostros cando nos movemus in is logos pùblicos. Custos ùrtimos sunt de difèndere, pro chi in issos is deretos nostros, is libertades nostras e is comunidades nostras siant amparados."
Custa est s'introdutzione a sa petitzione "Torra a ti pigare sa fache" pro pedire de proibire sa guardiania biomètrica, impreada in calicunu logu e pranificada o isperimentada in àteros. Cun custa genia de guardiania is sistemas informàticos podent connòschere is caras de onniunu de nois e registrare is movimentos nostros, mancari sinnalende·ddos a is autoridades cando su sistema ddos classìficat che "atividade assumbrada".

Pro calicunu custu est unu bantàgiu, ca permitit de prevènnere is crìmines e de nde agatare is responsàbiles cando custos acontessent. Pro àteros, nudda giustìficat un'invasione de sa riservadesa de is persones. Sa petitzione chistionat fintzas de stùdios chi ammustrant chi custas tecnologias ismànnient is discriminatziones e siant impreadas pro castigare a persones chi chircant isceti su respetu de is deretos issoro.

Sa petitzione, chi pedit de proibire custas pràticas comente unas cantas tzitades ant giai fatu e de publicare is resurtados de is guardianias giai fatas, at passadu is 8300 firmas in bator dies isceti. Totus dda podent firmare, chi sunt de acordu.