Wikinews serrat

Si nd'est arresonadu a tempos largos, ma a sa fine sa detzisione dd'ant leada e annuntziada de manera ufitziale: Wikinews (o Wikinoas) serrat.

Pro chie non dda connoschet, Wikinews est una prataforma in ue totus podent publicare noas de atualidade, polìtica e totu su chi agatamus in unu giornale cale si siat.

Su progetu no at mai atiradu unu nùmeru mannu de impitadores, nen de leghidores, giai chi sitos de noas a in donu nche nd'at medas e Wikinews non cumparet a fitianu tra is primos resurtados de is motores de chirca. In prus, ddoe est sa cuncurrèntzia interna de Wikipedia, in ue sa gente curret a chircare annoamentos cando acontesset cosa de importu.

Pro sa comunidade de Wikipedia est unu càmbiu de importu, ca finas a immoe si chircaiat de no imbrutare is pàginas cun is ùrtimos acuntessimentos e de ddas pònnere in die isceti cando is situatziones si faghiant prus istàbiles, invitende is impitadores a publicare is noas in Wikinews, ma custu non faghet oramai prus e at a tocare a coordinare su progetu de manera diferente.

Sa bandu pro su pùblicu mannu at a essi ghetadu su 4 de abrile e su progetu at a abarrare pùblicu in modu de leghidura isceti. Difìtzile a nàrrere si a su pòpulu de Internet at a amancare Wikinews o si non si nd'ant mancu a acatare. De seguru est unu sinnu de comente andant is cosas in Internet: no est chi sa gente non tèngiat gana de publicare totu su chi acuntesset, ma est craru chi preferit a ddu fàghere in prataformas sotziales, mancari a traessu de vìdeos curtzos. Difaits, mentras de vìdeos de denùntzia e cummentu in contu de temas de atualidade si nde bident ònnia die, podimus sinnalare su declinu de una prataforma comente YouReporter chi fiat nàschida pro ddos regòllere.