Atzetare is testimòngios o pagare: sa pràtica a s'esàmene de su garante

Si torrat a chistionare de testimòngios (o cookies, connotos in sardu fintzas cun sa furriadura literària boboetos o pistocos). In cale si siat giassu in ue intramus bidimus s'informativa pro s'impreu issoro - una pràtica bastante infadosa, cunsideradu chi ddoe at mègius tècnicas pro sarvare datos in su navigadore de s'usuàriu. Sa lege europea narat chi a s'impitadore bolet oferta sa possibilidade de denegare su permissu de sarvare testimòngios, ma pagu tempus a immoe is giornales italianos ant incumentzadu una pràtica noa: o s'atzetant is testimòngios o si pagat s'abonamentu.

Comente si podet immaginare, gente meda no est cuntenta e at sinnaladu custu cumportamentu a su garante pro sa privatesa de is datos personales.

A sa pràtica dd'ant postu su nòmine de "muru de testimòngios" e dd'ant analizada fintzas unos cantos periòdicos, isprichende chi in generale no est contras a is règulas fintzas a cando ddoe at un'alternativa pro lòmpere a su cuntènnidu e non ddoe at duda peruna chi pagare s'abbonamentu est un'alternativa a atzetare s'ammentu de testimòngios in su navigadore.

Custa bisura paret cunfirmada dae su garante, chi at analizadu is sinnalatziones e at rispostu chi in printzìpiu custa pràtica no andat contras a su regulamentu europeu, ma at annuntziadu chi est istudiende su problema in manera de pòdere pigare una detzisione definitiva prus a in antis.

Su cussìgiu chi potzo dare deo si bolides sighire leghende is noas de cussos giornales sarvende sa riservadesa de sa navigatzione est de ddu fàghere impreende una ventana de navigatzione anònima e de dda serrare luego a pustis de sa leghidura, a manera chi cussos testimòngios non potzant èssere impreados pro sighire sa faina bostra in su web. Sa navigatzione anònima (o privada) est una funtzione chi agatades in totu is navigadores de oe. Non cuat su chi faghides in sa retza, ma impedit a is giassos de sarvare informatziones de sa navigatzione in sa computera (o su telefoneddu).