Arribbat sa modalidade de inserru pro iOS e MacOs

Apple amegat de agiùnghere una funtzione noa pro permìtere una protetzione in prus de su dispositivu: sa modalidade de inserru (Lockdown Mode, in s'annùntziu originale). Custa modalidade naschet pro gherrare contra a atacos de programmas malos che Pegasus, unu programma-ispia isvilupadu dae s'azienda israeliana NSO group e impreadu pro iscocare e iscoviare informatziones de ativistas pro is deretos umanos, giornalistas e personàgios polìticos. Su nòmine est unu riferimentu craru a sa cuarantena chi amus bìvidu totus in s'ìnteri de su primu annu de pandemia de COVID-19. Si custa siat una bella idea o un'esertzìtziu de gustu malu, ddu lasso detzìdere a boisàteros.

Sa modalidade de inserru lìmitat unas cantas funtziones de su dispositivu chi podent èssere impreadas pro atacos informàticos:

• is archìvios agiuntos a unu messàgiu, a foras de is immàgines, e sa presentada de is ligòngios sunt blocados;
• unas cantas tecnologias web, comente sa cumpilatzione giustu-a-tempus de JavaScript sunt blocadas, si s'impitadore non ddas ativat a manu;
• tzerriadas FaceTime e messàgios arribende dae disconnotos sunt blocados;
• si bogant totu is albums cumpartzidos e is invitos benidores;
• is acàpios cun cavu dae su telefoneddu a su computadore sunt blocados;
• non faghet a installare profilos de cunfiguratzione.

Totu custos blocos serbint a avitare s'installatzione de programmas chene dd'ischire s'impitadore.
Sa funtzione at a èssere a disponimentu in iOS 16 e in MacOs Ventura. At a pertocare duncas telefoneddos iPhone, tauleddas iPad e cumputadores iMac e MacBook. Apple at ispetzificadu chi si tratat de una funtzione de impreare cando si suspetat un'atacu sèriu e sofisticadu, fatu raru chi no acontesset a sa parte manna de is impitadores.