10 alternativas a Google pro is chircas
Mancari Google oe siat famada pro medas servìtzios, unu de is prus de importu, chi est istadu su primu e at tentu sorte manna, est su motore de chirca. Google, lassende·nos impreare is trastos suos sena nos pedire dinari, balàngiat sighende sa navigatzione nostra in Internet e s'impreu de is aplicatziones pro telefoneddu, impreende is datos regortos pro bèndere sa publitzidade chi s'ammustrat. Sa positzione dominante de Google e totu is datos personales chi custa sotziedade collit ònnia borta chi impreamus elaboradores e telefoneddos, est una resone bona pro variare is issèberos nostros de is servìtzios de impreare, incumentzende de su chircadore. Abituados comente semus a impreare semper Google, mancu si nd'acatamus chi nche nd'at medas àteros. Bos bògio chistionare inoghe de unos cantos motores de chirca pagu famados chi però faghent unu bellu traballu.
- DuckDuckGo
Custu chircadore est su pre-definidu de una parte manna de is distributziones Linux. Sa prima borta chi dd'apo provadu, unos deghe annos a oe, no m'est pràghidu, ma a bellu a bellu est essidu agiumai vàlidu che Google. Sa promissa sua est de no ammentare datos personales e de no istorbare cun sa publitzidade. Est su chi in custu momentu so impreende de prus. - Startpage
Podet èssere su cumpromissu intra is resurtados bonos de Google e sa privatesa. Startpage impreat Google pro is chircas, ma ddu faghet sena ddi imbiare is datos nostros e sena ddos ammentare. - Ecosia
Motore de chirca interessante meda, basadu subra a is cuntzetos de ecologia e privatesa. Tres sunt is promissas suas. Sa prima est sa neutralidade de is emissiones de CO²: Ecosia impreat energias rinnovàbiles e impreat is balàngios suos pro pònnere àrbores. Sa segunda est de lassare is usuàrios anònimos. Sa de tres est sa trasparèntzia, giai chi pùblicant ònnia mese su rendicontu de s'impreu de su dinari chi balàngiant. - Istella
Est su chircadore de Tiscali, sotziedade sarda de telefonia. Deo ddu impreu calicuna borta e cussìgiu a bois àteros etotu de ddu fàghere, ma a dolu mannu medas bortas no agato su chi seu chirchende. Est megioradu cun su tempus ma ddoe at ancora traballu de fàghere. - WolframAlpha
Custu no est unu motore comente is àteros, ma meresset una nòmina. Imbetzes de dare una lista de sitos, proat a dare una risposta a sa pregonta de s'usuàriu. Deo, pro esèmpiu, apo chircadu "numbers in sardinian language" (nùmeros in limba sarda) e su resurtadu est ispantosu! - Qwant
Motore frantzesu, promitet, che DuckDuckGo, de respetare sa privatesa. Su disinnu regordat su de Google, cun in prus calicuna noa ammustrada in sa pàgina printzipale. Dd'apo provadu pagu, ma àteras opiniones in Internet nde chistionant bene meda. - Metager
Metager est unu meta-motore. Bolet nàrrere chi impreat is resurtados de àteros motores e ddos ponet in paris pro dare una risposta prus rica. In prus, gràtzias a s'impreu de unu proxy, lassat s'usuàriu anònimu. - Swisscows
Custu motore faghet una mapa de cuntzetos chi podent èssere collegados a is faeddos chircados, pro agiudare s'impitadore in sa chirca sua. Comente àteros, promitet su respetu de sa privatesa. - Bing
Su chircadore Microsoft, connotu de seguru dae is chi impreant Microsoft Internet Explorer o Microsoft Edge, ca est su motore pre-definidu. Est bellu meda de bisura e faghet unu bellu traballu. Comente Google, però, impreat is datos nostros pro bèndere publitzidade. - Yahoo
Forsis su prus betzu de is chi apo presentadu inoghe, est nàschidu in su 1994 e pro calicunu perìodu est istadu su prus famadu. Oe traballat in paris cun Microsoft, duncas is resurtados de sa chirca assimìgiant meda a is de Bing, e est ancora unu de is prus impreados.
Comente bidides, ddoe at una variedade manna, chi no finit inoghe. Isseberade su chi si praghet de prus. Pro ddos impreare in su telefoneddu, sa parte manna de issos tenet un'app chi podides installare, asinuncas onniunu de si donat is istrutziones pro ddu pònnere comente pre-definidu in su navigadore bostru.
Cummenta