Adiosu a is telefoneddos BlackBerry

Bos ddos regordades is telefoneddos BlackBerry? Annos a oe ant fatu s'istòria de is telefoneddos inteligentes, essende famados in cussu setore cun is mollos issoro, chi ant sighidu a portare una tastera fìsica in pari cun s'ischermu a tocu. A bellu a bellu, is BlackBerry ant tentu semper prus pagu sorte, agabbende cun sa noa chi cras at a èssere istudada de s'in totu sa retze chi permitit a is dispositivos cun su sistema BlackBerryOS de funtzionare.

Custu est isceti s'ùrtimu passu de unu declinu incumentzadu dae diora. Dae su 2016 BlackBerry at detzìdidu de si cuntzentrare isceti a pitzus de sa produtzione de programmas, lassende sa produtzione de telefoneddos a un'azienda esterna, impreende Android in logu de su sistema issoro, BlackBerryOS. Custos dispositivos però no ant tentu sa resèssida isperada - bolet naradu chi fiant caros meda, cunfrontados cun telefoneddos de àteras marcas - e in custu momentu non tenent mancu unu telefoneddu in su catàlogu, faghende pensare chi non siant prus interessados a custos trastos.

Pro is pregontas fitianas e pro ischire cales telefoneddos pertocat custa noa, faghet a lèghere sa pàgina de annùntziu ufitziale. Is mollos chi impreant Android ant a sighire a funtzionare.