Pranificadu s'adiosu a su 3G

Sa telefonia mòbile est a sa de cincu generatziones. Mancari medas de nois tèngiant ancora aparatos de una pariga de annos a oe e duncas non siant ancora impreende is tecnologias noas, de custu 5G nd'amus intèndidu chistionare giai tropu pro is cumplotismos chi ddoe sunt a giru, e fintzas pro totu su manìgiu chi bolet s'istantàrgiu de is retzes noas, comente s'òbligu de cambiare is aparatos televisivos pro liberare unas cantas frecuèntzias de dedicare a sa telefonia. S'annu chi benit, un'àtera cosa de importu at a acontèssere: ant a istudare su 3G.

Dd'at annuntziadu TIM e Vodafone dd'aiat giai pranificadu pro ocannu, cun sa promissa chi is resursas impreadas oe pro su 3G ant a serbire pro megiorare is retzes 4G e 5G.

Ite càmbiat po is impitadores? Nudda, pro is chi tenent unu telefoneddu o una tauledda pigados me is ùrtimos annos, ca de seguru sunt giai impreende a su mancu su 4G. Is chi tenint aparatos prus betzos ant a impreare una connessione 2G (GPRS, EDGE), prus lenta, chi at a sighire a funtzionare. Craru est chi si sa lestresa de sa connessione est de importu, prus che totu si s'impreat Internet pro is tzarradas àudiu/vìdeu, at a bòlere nàrrere chi est tempus de cambiare is aparatos cun mollos prus reghentes.
Apo bidu me in su web calicunu pensamentu pro aparatos de guardiania e àteros dispositivos cumandados de tesu chi bolent un'ischeda SIM e chi càncua borta funtzionant isceti cun protocollos 3G (UMTS, HSPA). Pro custos non faghet a èssere seguros e at a tocare a cuntatare is domos produtoras e pregontare.

No est sa prima borta chi naramus adiosu a una tecnologia chi no serbit prus in su mundu de is telefoneddos: su 31 de su mese de idas 2005 est acabbadu su servìtziu 1G (protocollu TACS), ma bolet naradu chi custu càmbiu at pertocadu pagu gente, ca sa difusione manna de is telefoneddos est incumentzada me is ùrtimos annos 90, cando ddoe fiat giai su protocollu GSM, de segunda generatzione.