Is noas de Fairphone 6

Mentres fia preparende s'artìculu in contu de su Fairphone pro su nùmeru 3 de sa revista de Ite Mi Contas est essida sa versione noa de su telefoneddu èticu. S'artìculu est renèssidu bene, calicunu mi dd'at fintzas bantadu e mi faghet praghere mannu, ma si faghet riferimentu a is piessìnnios de sa versione 5, duncas andamus a bìdere ite est cambiadu in sa 6.

Ischermu

A primu, s'ischermu si faghet pagu pagu prus piticu (6,31" cun una risolutzione de 1116x2484 contras is 6,46" con 1224x2700 de su betzu) ma aumentat sa frecuèntzia de annoamentu dae 90Hz a 120Hz e su tipu de pannellu passat dae OLED a LTPO OLED, frunende una mègius calidade de immàgine cun un'impreu prus efitziente de sa bateria.

Unidades de elaboratzione

Su mòlliu nou passat dae unu protzessore Qualcomm QCM6490 a unu Snapdragon 7s Gen 3, prus reghente, prus lestru e cun una mègius efitzèntzia.
Sa GPU (chip de elaboratzione gràfica) passat dae s'Adreno 643 a s'Adreno 810 megiorende sa rèndida de giogos e àteras aplicatziones multimediales.

Memòria

Sa memòria interna abarrat a is 256GB de sa mègius versione de su 5, cun sa possibilidade de pònnere una microSD finas a 2TB.
Sa RAM est de 8GB

Bateria

Si passat dae una de 4200 mAh a una de 4415 mAh, promitende una durada finas agiumai a 54 oras.

Retzas

Fairphone suportat is retzas 5G cun duas SIM, una fìsica e una eletrònica (eSIM). In prus, tenimus su WiFi, BlueTooth, NFC, GPS e àteru.

Sistema e aplicatziones

Su telefoneddu si bendet cun Android 15 o, a seberu, cun /e/OS, s'Android deGooglizadu e rispetosu de sa riservadesa chi bos apu giai contadu. De seguru, tra pagu ant a èssere a disponimentu fintzas LineageOS, Ubuntu Touch e forsis àteros sistemas puru. Su telefoneddu NON portat totu cussas aplicatziones inùtiles chi faghent su sistema pesosu e chi, pro carchi resone, non faghet a nde tirare (bloatware - software chi unfrat), unu puntu chi meresset de èssere remonadu.

Fairphone Moments

Custa est una noa de interessu: su Fairphone 6 tenet unu tastu chi permitit de passare a una modalidade minimale, pro si pasare e pro non tènnere sa distratzioni de notìficas e aplicatziones vàrias. Est de utilidade cando nos bolimus cuntzentrare a subra de àteras fainas ma non bolimus istudare su telèfonu de su totu. Pro nd'ischire de prus, leghe custu artìculu.

A parte is cumponentes eletrònicos e is programmas, non depimus iscarèssere cales sunt is prus cosas de importu de Fairphone: su fatu de favorèssere unu cummèrtziu giustu in ue is matèrias primas non benint dae s'isfrutamentu de pipios o de òmines tratados che iscraos e su fatu chi totu is cumponentes de su telefoneddu si potzant cambiare in s'in casu s'arroghent: in su situ s'agatat onni parte, de manera chi si, pro nàrrere, si guastat sa fotocàmera, non tocat a nche fulliare totu su telèfonu.

In sa retza s'agatant giai unas cantas retzensiones de su Fairphone 6 chi bantant su disìnniu (in fines sunt renèssidos a non si fàghere nàrrere chi su telefoneddu paret giai betzu, comente naraiant de is versiones de in antis!), s'ètica de su progetu, sa modularidade de is cumponentes, s'ischermu e sa memòria, ma crìticant is prestatziones e sa fotocàmera, chi non arribant a is de àteros mòllios de prètziu parìvile.

Fairphone duncas est istadu annoadu ancora una borta e mancari non ddoe siant càmbius de importu mannu, s'acostat a su pròpiu livellu de is àteros telefoneddos mèdios chi agatamus me is butegas. Abarrat su mègius sceberu si bolimus unu telefoneddu chi potzat durare annos e annos ca faghet a dd'arrangiare si una parte si guastat e si bolimus unu dispositivu rispetosu de is deretos umanos e unu pagu prus atentu fintzas a sa riservadesa nostra.

Pro nd'ischire de prus, bos imbiu a su giassu ufitziale.

S'immàgine de cobertedda est de Fairphone - https://www.flickr.com/photos/fairphone/54611701742/, CC BY-SA 4.0, Ligòngiu