Installaus Apertium in Linux

Apertium, po is chi no ddu scint, est unu tradutori automàticu cun lìnguas diferentis, su primu chi fùrriat s'italianu e atras lìnguas in sardu. Est unu trastu de utilidadi manna, integrau cun sa Wikipedia sarda puru po permiti sa bortadura automàtica de is pàginas.

De sòlitu, impreaus Apertium cun s'aplicatzioni web, ma acuntessit dònnia tanti chi no funtzionit o chi no ddoi siat connessioni a internet, duncas est bellu puru a ndi teni una còpia installada in s'ordinadori. A dolu mannu, po su momentu no ddoi at un'aplicatzioni gràfica po ordinadori o telèfonu de Apertium, ma s'aplicatzioni a lìnia de cumandu est fàcili de impreai. Bideus cumenti funtzionat in Linux (po Windows e Mac, bidei sa wiki oficiali).

Sa manera de dda installai dipendit de sa distributzioni de Linux chi seus impreendi, ma innoi bideus cumenti fai cun Debian e derivadas (cumenti Ubuntu, Mint, etc). Totu su chi depeus installai funt is pachetus apertium e apertium-srd-ita. Ddu podeus fai un Synaptic opuru aberri unu Terminali e scriri

sudo apt-get install apertium apertium-srd-ita

Candu eus postu sa crai e s'installatzioni est acabada, podeus fai una proa scriendi

echo "ciao mondo!" | apertium ita-srd

S'arresurtau at a essi

salude mundu!

Podeus puru furriai un'archìviu intreu de testu scriendi

apertium ita-srd archiviu-intrada archiviu-essida

Est totu. Bona furriadura!