Ativistas Anti-5G pigant gàbbias de Faraday e a pustis si nde chèsciant

Est faghende su giru de su Web in custas dies sa noa de is ativistas Anti-5G chi ant pigadu una gàbbia de Faraday pro blocare is undas eletromannièticas de s'incamminadore de retze (router) e a pustis si nde sunt chesciados pro ite ca sa retze WiFi no funtzionaiat prus.
Non si cumprendet bene ite nc'intrent custos dispositivos domèsticos cun su 5G: podet èssere chi, a su sòlitu, is prus pagu espertos confundant su 5G de sa telefonia mòbile cun is retzes WiFi a 5Ghz, duas cosas de s'in totu diferentes. Craru chi una gàbbia de Faraday progetada pro blocare is undas a 5Ghz at a blocare s'arretza WiFi (tantu balet a dd'istudare) e comente e chi siat non serbit a nudda contras a su 5G.
De ogetos che custu si nd'agatant medas in Amazon e a nàrrere sa beridade no est sa primu borta chi nd'intendemus chistionare, giai chi carchi borta agatamus fintzas in is potecarias cussos "còrgios" pro telefoneddos chi diant a dèpere blocare is undas.

Is commentos chi leghimus in is pàginas de custos produtos sunt ispassiosos meda. Unu, pro esempru, narat:

Nanca custa gàbbia est progetada pro lassare a foras su sinnale sena filos, ma impèdumat puru sa retzidura de is sinnales WiFi de s'incamminadore miu. Sa potèntzia de su sinnale WiFi in su casteddu miu est redùsida giai a zeru. Unu faddimentu a livellos medas.

Paret ispantu, ma su chi nos imparant custas esperièntzias est chi gente meda impreat dispositivos chi no ischit comente funtzionant. No naro chi totus diant a dèpere connòschere totu is minudas tècnicas de elaboradores e telefoneddos, ma diat a dèpere èssere craru chi si blocamus is frecuèntzias eletromannièticas a unu dispositivu chi ddis serbint pro funtzionare, su resurtadu podet èssere isceti chi custu dispositivu no at a funtzionare prus. Est comente a tirare is rodas a una vetura.

Custa borta no faghet mancu a chistionare de trampa pro is brallocos: sa gàbbia de Faraday faghet su traballu suo blochende is undas eletromannièticas, comente narat sa descritzione!