Google Play Mùsica serrat

Google Play Mùsica est una de cussas aplicatziones chi medas de nois no impreant ma chi non faghet a bogare dae su telefoneddu, ca sunt cunsideradas "aplicatziones de sistema". Serbit a comporare mùsica, a sa pròpiu manera de iTunes e Amazon Music e permitit fintzas de dd'ascurtare comente in Spotify. Comente si siat, Google at detzìdidu de dda serrare a fine de ocannu. Is funtziones suas ant a èssere postas a disponimentu dae YouTube Music, in ue is impitadores podent portare sa mùsica chi ant giai comporadu, pro non dda pèrdere.

Su problema de dèpere mòere sa mùsica comporada no est de pagu contu e ammustrat sa debilesa de pigare produtos eletrònicos sena unu suportu fìsicu (CD, DVD, etc) o a su mancu s'archìviu de iscarrigare: si su frunidore serrat, ddoe at semper s'arriscu de ddos pèrdere.