Arribbat Android 11

Est de pagas dies a oe sa noa de s'arribu de s'anteprima de sa versione 11 de su sistema prus famadu pro is telefoneddos inteligentes. Custa anteprima est a disponimentu de is isvilupadores, chi podent incumentzare a averguare su funtzionamentu de is aplicatziones issoro.
Cun custu sistema, Google megiorat sa compatibilidade de su sistema suo cun is ùrtimas novidades e fintzas de donare a is impitadores prus seguridade e una mègius esperièntzia de impreu. Andemus a bìdere is novidades prus de importu.

5G

Sa de chimbe generatzione de retzes mòbiles at a essire sa norma in is pròssimos annos. Is dispositivos noos ant a èssere capatzos de cumprèndere sa velotzidade de sa retze sena imbiare datos pro dda mesurare. Custu gràtzias a una API posta a disponimentu dae su sistema. In prus, su sistema at a pòdere cumprèndere si su pianu de datos mòbiles tenet limitatziones de tràficu pro chircare de otimizare s'imbiu e sa recherta de datos e, in custa manera, evitare de isprecare sa banda a disponimentu.

Tipos noos de ischermu

De meda tempus si chistionat de ischermos mujaditos. Custu però no est s'ùnicu tipu de ischermu ispetziale. Su sistema nou depet èssere bonu a manigiare ischermos de totu is formas, donende a is isvilupadores sa possibilidade de isseberare comente is aplicatziones ant a apàrrere. Pro nd'ischire de prus, bide custu artìculu.

Arresonos

Ddoe at megioramentos a sa possibilidade de rispòndere a manera lestra a is arresonos, deretu in s'anteprima issoro.

Privatesa

Arribbant maneras noas de donare permissos a is aplicatziones. Sa modalidade temporale "Permissu una borta isceti" est prus che totu de importu pro controllare is rechertas de atzessu a is resursas de su dispositivu.