Arribat Android 11

Est de pagus diis a oi sa noa de s'arribu de s'anteprima de sa versioni 11 de su sistema prus famau po is telefoneddus inteligentis. Custa anteprima est a disponimentu de is svilupadoris, chi podint incumentzai a averguai su funtzionamentu de is aplicatziones insoru.
Cun custu sistema, Google amellorat sa compatibilidadi de su sistema suu cun is ùrtimas novidadis e fintzas de donai a is impitadoris prus seguridadi e una mellus esperièntzia de impreu. Andaus a biri is novidadis prus de importu.

5G

Sa de cincu generatzioni de retzas mòbilis at a bessiri sa norma me is pròssimus annus. Is dispositivus nous ant a essi capatzus a cumprèndi sa velotzidadi de sa retza chena imbiai datus po dda mesurai. Custu gràtzias a una API posta a disponimentu de su sistema. In prus, su sistema at a podi cumprendi chi su pianu de datus mòbilis tenit limitatzionis de tràficu po cicai de otimizai s'imbiu e s'arrecherta de datus e, in custa manera, evitai de sprecai sa banda a disponimentu.

Tipus nous de schermu

De meda tempus si chistionat de schermus moddis. Custu perou no est s'ùnicu tipu de schermu speciali. Su sistema nou depit essi bonu a manigiai schermus de totu is formas, donendi a is svilupadoris sa possibilidadi de sceberai comenti is aplicatzionis ant a aparri. Po ndi sciri de prus, bì custu artìculu.

Arrexonus

Ddoi at amelloramentus a sa possibilidadi de arrespundi a manera lestra a is arresonus, deretu in s'anteprima insoru.

Privadesa

Arribant maneras noas de donai permissus a is aplicatzionis. Sa modalidadi temporali "Permissu una borta sceti" est pruschetotu de importu po controllai is arrechertas de acessu a is resursas de su dispositivu.