Facebook at atzetadu de tzensurare is messàgios in Vietnam

Noas malas pro sa libertade de espressada in Vietnam in ue Facebook, a pustis de àere sufridu pressiones dae s'istadu, at atzetadu de tzensurare is messàgios contra a su guvernu. In is primos meses de ocannu unos cantos serbidores de sa retze sotziale fiant istados istudados, limitende sa disponibilidade de sa prataforma pro is usuàrios e su Vietnam aiat incurpadu Facebook de àere violadu sa lege pro sa tziber-seguresa, lassende creare a is usuàrios messàgios anti-guvernu.

Immoi Facebook at decraradu de àere postu mente "a mala bògia" a sa cumanda de su guvernu de "limitare s'atzessu a cuntènnidos chi at retentu illegales"..
Sa resone pro custu, diat a pòdere èssere sa boluntade de Facebook de cunservare is balàngios suos in su chi est unu de is mercados prus de importu in Àsia.
Pro sorte, ddoe at semper sa manera de inghiriare unu blocu, pro esempru impreende unu proxy o unu servìtziu de VPN.