Spotify e sa tecnologia sua pro "lèghere" is emotziones

Spotify e sa tecnologia sua pro "lèghere" is emotziones

Logo de Spotify. Immàgine de MIH83 pigada dae Pixabay

Spotify est unu servìtziu impreadu meda pro ascurtare mùsica in lìnia me is ùrtimos annos. Unas cantas funtziones suas sunt pràghidas meda a is impitadores, comente sa creatzione automàtica de listas de ascurtu personalizadas, cun un'algoritmu chi imparat su gustu de s'ascurtadore. Una funtzione noa, mai impreada pro immoe ma in cursu de brevetu, at giai mòvidu is chèscias de Access Now, un'assòtziu pro s'ammànniu de is deretos tziviles digitales.

Custa funtzione permitit de ascurtare is resonos de s'impitadore e cumprèndere s'emotzione sua gràtzias a sa variatzione de boghe, in pari cun àteros naturales de sa persone, comente edade, gènere e atzentu.

Access now at imbiadu una lìtera a is imbistidores de Spotify narende:

ant pesadu dudas sèrias a subra de sa base sientìfica de is tecnologias chi chircant de cumprèndere s'istadu emotivu e àteros naturales de is indivìduos. Ma mancari custa tecnologia funtzionessit, diat a violare is deretos de is indivìduos a sa privatesa, a sa non-discriminatzione e a sa libertade de espressione.

Sa lìtera crìticat fintzas sa positzione de podere chi is frunidores de custas tecnologias diant a pigare impreende su manìgiu emotivu de is impitadores. Bellu meda s'agabbu chi ant impreadu, e difìtzile meda est a no èssere de acòrdiu:

Comente imbistidores influentes, seis in una positzione ùnica pro assegurare chi sa tecnologia de Spotify non siat impreada pro intzullare abusos de is deretos umanos. Pro custu bos cumbidamus a pigare positzione in defensa de sa dinnidade umana e a pedire a Spotify de s'impinnare a no impreare, cuntzedere in lissèntzia, bèndere o gadangiare mai cun custa tecnologia dannàrgia.

Cummenta