Piracy Shield est unu fallimentu.. ma abarrat

Una pariga de dies a oe est essidu a pìgiu chi Piracy Shield at blocadu Google Drive in s'intentu de firmare cuddos sitos chi permitint de castiare is partidas de pallone a in donu chene nde tènnere su deretu. Una faddina, tzertu, chi però cuat unu problema prus mannu.

Piracy Shield est una prataforma istantargiada comente a efetu de sa lege italiana n.93 de su 14 de làmpadas de su 2023 cun sa punna de limitare s'ispainadura de cuntènnidos protetos dae deretu de autore chene permissu. Sa prataforma blocat s'indiritzu IP de serbidores chi ispainant custu materiale a pustis de retzire sa sinnialatzione dae figuras chi ddis narant Segnalatori attendibili (Sinnialadores fidàbiles).

Su problema de custa solutzione est in sa natura etotu de Internet: is indiritzos IP sunt limitados e sunt assinniados in manera dinàmica, duncas su pròpiu IP podet èssere impreadu in momentos diferentes (fintzas in pagos minutos) dae persones e servìtzios diferentes. Blocare un'indiritzu IP duncas no est una manera bona de gherrare contras a sa pirateria in lìnia e podet fàghere dannu, comente est acuntèssidu cun Google Drive.

No est sa primu borta chi su guvernu italianu ammustrat de non cumprèndere bene comente funtzionat Internet (ddu bidimus puru cun sa proposta de pedire su SPID pro imbucare in sitos porno) e imbentat provedimentos chi non giuant. S'idea difatis dd'ant criticada espertos in Itàlia e a foras, ma s'Agcom no at bòlidu pònnere mente e sa prataforma pro su momentu abarrat istantàrgia.