Piracy Shield est unu fallimentu.. ma abarrat

Una pariga de diis a oi est bessiu a pillu chi Piracy Shield at blocau Google Drive in s'intentu de firmai cuddus situs chi permitint de castiai is partidas de palloni a in donu chena ndi tenni su deretu. Una faddina, certu, chi perou cuat unu problema prus mannu.

Piracy Shield est una prataforma strantaxada comenti a efetu de sa lei italiana n.93 de su 14 de làmpadas de su 2023 cun sa punna de limitai sa spainadura de cuntènnius protetus de deretu de autori chena permissu. Sa prataforma blocat s'indiritzu IP de serbidoris chi spainant custu materiali apustis de arrici sa sinnialatzioni de figuras chi ddis narant Segnalatori attendibili (Sinnialadoris fidàbilis).

Su problema de custa solutzioni est in sa natura etotu de Internet: is indiritzus IP funt limitaus e funt assinniaus in manera dinàmica, duncas su pròpiu IP podit essi impreau in momentus diferentis (fintzas in pagus minutus) de personas e servìtzius diferentis. Blocai un'indiritzu IP duncas no est una manera bona de gherrai contras a sa pirateria in lìnia e podit fai dannu, comenti est acuntèssiu cun Google Drive.

No est sa primu borta chi su guvernu italianu amostat de no cumprendi beni comenti funtzionat Internet (ddu bieus puru cun sa proposta de pediri su SPID po imbucai in situs porno) e imbentat provedimentus chi no giuant. S'idea difatis dd'ant criticada espertus in Itàlia e a foras, ma s'Agcom no at bèofiu ponni mente e sa prataforma po su momentu abarrat strantaxa.