Is istòrias de Telegram sunt isparèssidas e nemos ischit pro ite

Calicunu forsis si nd'est agatadu: in Telegram sa barra chi ammustraiat is istòrias non si bident prus. Faghet ancora a bìdere is postadas betzas in su profilu ma non ddoe est prus sa possibilidade de nde creare noas. Custu acontesset siat cun su telefoneddu siat in sa versione Desktop.

Is istòrias sunt unu piessìnniu de vàrias retzas: permitint de ammustrare unu cuntènnidu lestru, comente un'immàgine e una descritzione curtza chi a su sòlitu aparit pagos segundos pro lassare su logu a sa chi benit, unu sìmbulu de la lestresa de s'Internet de oe, in ue sa cosa si faghet pro si dda iscarèssere pagos segundos a pustis.

Is istòrias de Telegram, comente si siat donant sa manera de cumpartzire calicuna cosa cun totu is cuntatos chene dèpere creare grupos o imbiare messàgios privados. Esistint dae su 2023, in s'incumentzu isceti pro is impitadores de Telegram Premium (a pagamenta) e unu mese a pustis pro totus.

A incumentzare dae una pariga de dies a immoe, sa barra de is istòrias non cumparet prus in s'interfache, cosa chi nos ant cunfirmadu impitadores vàrios, ma in Internet non s'agatat nudda in contu de custa istrolichèntzia: Telegram no at annuntziadu de nche ddas àere tiradas dae su programma (in beridade, non ddoe est mancu su registru de is càmbios pro sa versione 5.13.1 chi semus impreende immoe) e sunt ancora remonadas in sa lista de funtziones. In custu momentu duncas non si cumprendet ita est acontèssidu, si siat unu problema de is serbidores o unu seberu de sa sotziedade chi distribuit Telegram.
Una cosa però si podet nàrrere: paret chi is istòrias no manchent a nemos, sende chi non ddoe sunt chèscias in nissunu logu!

ANNOAMENTU DE IS 21:15:

A pustis de unas cantas oras, unu voluntàriu de su suportu de Telegram m'at fatu ischire chi sa funtzione est torrada a pagamenta e duncas est a disponimentu isceti pro is impitadores de Telegram Premium. Istranu meda chi apant detzìdidu de ddu fàghere a sa muda, chene nàrrere nudda a nemos, ma aici est...