ChatGPT e Alexa sunt in crisi

Custas dies semus leghende noas medas chi contant sa crisi in ue si sunt agatende custos duos produtos famados: Alexa, s'assistente vocale de Amazon, e ChatGPT, su chatbot de OpenAI chi at fatu arresonare e oriolare meda in s'ùrtimu annu.

Alexa est un'aina chi est lòmpida a 10 annos de vida. Est una de is chi ant portadu a primu s'inteligèntzia artifitziale a is domos nostras. Bona a connòschere is cumandos de boghe, permitit de chircare informatziones in su web, pònnere mùsica, ativare pro-memòria e isvèllias e a cumandare dispositivos de domòtica cumpatìbiles (lughes, àera cunditzionada, eletrodomèsticos, etc). Faghet fintzas a nd'ammanniare sa funtzionalidade agiunghende aplicatziones comente acostumamus cun is telefoneddos.
Mancari Alexa siat intrada in domos medas, essende fintzas unu sèberu fitianu pro regalos de festas de Paschixedda (in dispositivos comente Amazon Echo), sa divisione sua in Amazon est in pèrdida manna, cun 25 milliardos de deficit. Paret chi custa situatzione siat neghe de s'istrategia de bèndere is dispositivos Echo a pagu prètziu pro pòdere balangiare prus tardu a traessu de s'impreu de Alexa, ma is cosas non sunt andadas bene.
Leghende is cummentos me is retzas sotziales, in prus, paret chi is impitadores non siant prus cuntentos de su connoschimentu de is cumandos e su chi custos dispositivos oferint, comente chi si trataret de una tecnologia oramai betza.
Amazon at detzìdidu de annoare s'IA de Alexa cun mòllios noos, chi ant a permìtere unu mègius arresonu cun su dispositivu e de portare cumandos prus cumplessos a cumprimentu. Custas funtziones noas ant a èssere a disponimentu paghende un'abbonamentu de unos 10 dòllaros a su mese. Difìtzile a nàrrere si custa istrategia at a funtzionare. Tocat a nàrrere chi ddoe sunt fintzas oriolos in contu de sa privatesa, sende chi custos trastos tenent unu micròfonu semper abertu, un'iscenàriu chi calicunu cunsìderat Orwellianu. A proa chi custu oriolu no est tontu, tocat a cunsiderare chi una borta sa Giustìtzia at impreadu is datos de Alexa pro chircare is proas de un'ochidòrgiu, ca su dispositivu teniat sa registratzione de totu su chi fiat acontèssidu in un'aposentu privadu, e chi àteras bortas Amazon at impreadu fintzas umanos pro ascurtare is registratziones.

Pro cantu pertocat ChatGPT, si nde faeddat ònnia die in custu perìodu, a bortas tratende·dda che unu Deus ex Machina chi at a arrangiare totu is problemas de su mundu e a bortas che unu dimòniu chi nos nd'at a furare totu su traballu, lassende s'umanidade a su fàmine. Connoschende mègius su trastu, sa realidade paret meda prus nojosa de aici. ChatGPT est unu trastu chi, a traessu de s'imparu automàticu, podet generare testos chi simìgiant a cosa iscrita de umanu. Agiumai totu is motores de chirca in die de oe oferint sa possibilidade de arresonare cun chatbot che custu pro chircare informatziones a sa lestra o generare testos pro lìteras, blog, etc. Est craru chi unu trastu che custu tenet sa potentzialidade de èssere impreadu comente a assistente a fainas umanas de onni tipu, ma cantu a sa possibilidade de pigare su logu a is umanos etotu, abarrant dudas medas, sende chi su resurtadu est bortas medas impretzisu, limitadu e fintzas isballiadu e dannàrgiu.
Est possìbile chi, a pustis de una fase de entusiasmu mannu, is impitadores siant giai perdende s'interessu pro ChatGPT e pro is chatbot in generale o fintzas chi sa cuncurrèntzia manna chi ddoe est in custu setore siat limitende is balàngios de OpenAI chi est in una situatzione de pèrdida chi dda ponet in perìgulu de fallimentu. De seguru, calicuna cosa de pònnere in contu est s'impreu de energia chi s'IA bolet, unu costu mannu pro is frunidores (e fintzas pro su praneta nostru). Si càrculat difatis chi ChatGTP tra pagu at a bòlere s'energia de una natzione intrea.
No ischimus cales istrategias at a proare OpenAI pro si sarvare dae su fallimentu. Una risposta diat a pòdere bènnere dae una versione lèbia de ChatGPT, GPT-4o, chi at a agiudare a ammanniare su nùmeru de impitadores.

Fontes:

Etichetas

OpenAI

ChatGPT

Amazon

Amazon Echo

inteligèntzia artifiziale

Assistente vocale

Cummenta

Categorias

Eletrònica