Una bella Die de sa Sardigna!

Unu saludu bellu a totus.
Oi est sa festa de su pòpulu sardu e apu decìdiu de arregolli su cumbidu de sa Fondazione Sardinia a scriri duus fueddus po dd'afestai.

Sa Sardigna est bivendi unu momentu difìcili e tristu, cun s'isulamentu, su pensamentu po s'imbenidori e un'amministratzioni chi no est fadendi unu bonu traballu in su manìgiu de s'emergèntzia. Fintzas cun custus pensamentus, is sardus ant amostrau coràgiu e generosidadi, donendi totu s'agiudu possìbili, fintzas cun donatzionis de dinai a is spidalis chi ant passau in totale su millioni de èurus e cun su fàbricu de màscaras chirùrgicas po is operadoris sanitàrius.

Puru sa cuarantena podit perou tenni calincuna cositedda de positivu. Po esempru, genti meda tenit prus tempus po ligi e studiai de prus. E insandus, poita no pigai custa ocasioni po imparai pagu pagu de prus in contu de sa stòria de Sardigna, incumentzendi de su sentidu de custa dii? De materiali nci nd'at meda, fintzas in sardu, de sa pàgina de Wikipedia a atrus giassus web, lìburus, etz. Podeis partiri de is notas de sa pròpiu pàgina po biri unu pagu de bibliografia.
Est spantosu cantu si podit imparare sa stòria de is antepassaus nostus e s'iaus a depi pregontai poita sa scola ndi chistionat pagu e nudda a is piciocus.

Sardumàtica at circau de si giai materiali po passai su tempus e s'informai asuba s'informàtica in sa lìngua nosta e at a sighiri fintzas a pustis, poita ca seus fierus de sa cultura nosta e no acetaus de tenni una lìngua po sa scièntzia e una po sa brulla.

Passai una bella Die de sa Sardigna, si bideus luegus.