Sony abandonat sa forma fìsica de is giogus

Custas diis s'est arraxonendi meda de sa decisioni de Sony de abandonai de su totu is CD/DVD comenti a forma de publicai is giogus po sa PlayStation, passendi de su totu a su scarrigamentu digitali.

Sa decisioni parit un'evolutzioni naturali de sa manera de impreai is cuntènnius, siant mùsica, tzìnema, giogus e aplicatzionis. A pagu a pagu difatis is CD funt sparèssius de sa vida diària de medas de nosu, a su puntu chi giai de diora meda is PC no tenint prus su ligidori integrau, chi imoi bolit comporau a parti. Is produtoris de consolas de giogu ant postu a disponimentu butegas digitalis che is de is telefoneddus, e fintzas is giogadoris de PC impreant Steam o àteras butegas invecis de andai a comporai is giogus in forma de discu.

Mancari totu custu, impitadoris medas si funt postus contras a custa noa. Su discu fìsicu difatis rapresentat meda de prus chi no su giogu de carrigai in su dispositivu. A primu, a medas de is giogadoris praxit a fai colletzioni de giogus. Segundu, si mancat sa forma fìsica, mancat fintzas sa possibilidadi de torrai a bendi su giogu. A is produtoris de seguru cumbenit a bociri su mercau de sa segunda manu, de manera chi sa genti sigat a comporai cosa noa, e ddis cumbenit puru a eliminai is costus de imprenta e distributzioni de is discus, ma custu cumbenit prus pagu a is giogadoris chi no podint circai is tìtulus in ebay o àtera prataformas. Ma su prus problema mannu de custa idea dd'eus giai biu custas diis, candu Sony at bogau tìtulus medas de su catàlogu e personas chi ddus iant giai comporaus ddus ant pèrdius: cun unu CD/DVD custu no iat a essi possìbili, ca su suportu fìsicu abarrat in domu nosta e nemus ddu podit arretirai.

Abarrat duncas sa duda, si seus movendi unu passu ainnantis o si custu càmbiu cumbenit sceti a is aziendas mannas, mentres nosu s'agataus sèmpiri prus pagu in manu. Po chini totu ddi podit interessai, ddoi est una petitzioni po pediri a Sony chi cambit custa decisioni. Dd'agatais innoi.