S'averìguu de s'identidadi po is situs porno

A incumentzai de su 12 de su mesi de donniasantu de su 2025 is impitadoris ant a essi obligaus a fruniri is datus insoru a is situs pornogràficus (o, assumancu, a is situs de una lista frunida de su ministèriu) de manera chi custus si potzant assegurai chi s'impitadori tèngiat 18 annos o prus. S'averìguu s'at a fai impreendi su SPID o àterus trastus de identidadi digitali.

S'idea, narau craru, est tonta e dannàrgia, tìpica de unu guvernu innioranti o in fidi mala.

Tonta, ca:

• calisisiat piciocheddu sciit ita est una VPN, sciit chi unas cantu funt a in donu e fintzas incorporadas in unus cantu navigadoris (Òpera e Vivaldi, po nai);
• is prataformas ant a fini po istraviai is averìguus ponendi situs "mirror" chi ant a cambiai indiritzu cada mesi comenti faint giai Altadefinizione e àterus;
• unu piciocu cun hardware bellu podit installai unu mòlliu de IA in domu, generai vìdeu a sa sola e ddus imbiai a is amigus, narendi adiosu a is averìguus.

E dannàrgia ca:

• donat datus personalis a giassus cun sei a foras de s'UE;
• at a incoragiri is impitadoris a circai materiali prus pagu averiguau.
  Praxat o no, assumancu Youporn e àterus avèrguant is vìdeos chi ddoi càrrigant po s'assegurai chi no siant òpera de violèntzia. Me is tzarradas criptadas e in su dark web custu amparu no esistit.
  Calincunu at a podi nai chi mancu s'averìguu de is prataformas est perfetu, e est berus, ma tocat a nai puru chi apustis de is scàndalus de una pariga de annus a oi, calincuna de is prataformas ant decìdiu de acetai sceti vìdeus de impitadoris averiguaus e de ndi bogai totu is vìdeus chi pintant scenas de violèntzia, mancai recitada;
• su puntu precedenti at a fai torrari a pensai a peus medidas comenti a su "chat control" chi po imoi dormit ma no est de su totu abbandonau;
• smurrat e no èducat: no informat in contu de su filtru famìlia (o parental control), chi podit essi ativau in is aparatus, e no spricat chi a is piciocus asuta de una certa edadi non diat depi essi permìtiu a arrolliai in Internet chena supervisioni.

Assafini, si donat un'àtera solutzioni chi no giuat. Si ndi bogat sa responsabilidadi a is famìlias chi nanca si bolit amparai e si còmplicant in manera inùtili cosas chi iant podi essi prus simpris cun unu mìnimu de imparu, po arribai a nudda o, peus, a fai prus dannu. In manera paradossali, custu guvernu at a acabai po essi ammentau comenti a su chi at vietau su porno a is eletoris suus de riferimentu, chi comenti a informàticu si potzu assegurai chi funt tra is consumadoris prus fitianus de pornografia: indivìduus de mesu edadi o de edadi avantzada, innorantis de cosa digitali e chi no sciint impreai ni una VPN ni su SPID.