S'Europa est abbandonende su metaversu?
Fiat unu progetu ambitziosu: ddi narant Global Gateway e depiat èssere una pratza virtuale, prus che totu pro persones a suta de is 35 annos pro s'addobiare, promòvere balores de s'Unione Europea e "resonare a pitzus de chistiones globales pro fàghere sa diferèntzia pro su benidore nostru cumpartzidu". Ddoe depiant pigare parte aziendas mannas, depiat permìtere s'interoperatividade cun àteras prataformas e nde depiat leare su monopòliu de s'Internet immersivu a Meta, chi però issa etotu tenet problemas cun su progetu suo.
Ite est acontèssidu, duncas?
Est acontèssidu chi forsis custa idea de metaversu no interessat a sa gente comente parent pensare unas cantas aziendas chi nc'ant postu fintzas dinari meda.
Global Gateway est costadu 387.000€ e sa festa organizada in sa prataforma sua pro dda presentare est abarrada bòida, comente at ammustradu su giornalista Vince Chadwick cun unu vìdeu curtzu. In custu vìdeu su metaversu paret prus unu giogu pro PC de is annos 90, cun avatar legigheddos, elementos de iscena chi podiant èssere pigados dae una de is primas versiones de The Sims e s'agràviu chi a oe no est prontu nissunu dispositivu de realidade virtuale pro ddoe intrare comente acontesset in museos e àteras installatziones, nen ischimus nudda de una campànnia de publitzidade pro ddoe acostare a sa gente. Fintzas su slogan chi apo apòrridu in s'incipit sonat che sa sòlita fràsia de politicantes chi non bolet nàrrere nudda in cuncretu.
Sa Cummisione Europea at duncas detzìdidu de serrare sa prataforma a tempus indeterminadu e de nominare unu consulente pro dda fàghere avalorare in manera indipendente. Su destinu duncas no est ancora iscritu, ma est intzertu meda.
Totu custu regordat is esperimentos de Desktop 3D de is primos annos 90, cun progetos comente Microsoft Bob chi però no ant acapiadu s'interessu de is impitadores, chi cun una simpre iscrivania 2D fiant giai cuntentos. Craru est chi cando non s'isperimentat non si podet ischire ite at a pràghere o no a su pòpulu de Internet, ma est puru giustu a istacare s'ispina a cussos progetos chi finas a immoe ant isceti fatu fuliare dinari.
Cummenta