Torrant is telefoneddos cun baterias rimovìbiles?

Nde chistionat Tom's Hardware chi pigat sa noa dae una rivista olandesa.
Paret chi s'Unione Europea siat chirchende de ismanniare sa vida de is telefoneddos inteligentes. Totus ischimus chi unu de is problemas prus comunos cun is telefoneddos est sa bateria chi s'iscàrrigat semper prus in presse.

Sa bateria però non si podet cambiare sena portare su dispositivu a unu tzentru ispetzializadu cun unu gastu chi a bortas est prus de su balore de su telefoneddu etotu, duncas sa parti manna de nois còmporat unu telèfonu nou, un'isprecu de risorsas chi s'umanidade non si podet prus permìtere. Cun sa possibilidade de bogare is baterias, s'impitadore nde at a pòdere comporare una noa e dda montare sena connoschèntzias tècnicas, sena dèpere ismontare su telefoneddu e arriscare de dd'arrogare.

Pro immoi, nudda est cunfirmadu nen dae s'UE nen dae is produtores chi, in capas, no ant a èssere cuntentos de dèpere torrare a cambiare su disinnu de is produtos issoro.