Una petitzione pro liberare a Clippy

Una petitzione pro liberare a Clippy

ClippyBos ddu regordades a Clippy, s'assistente de is versiones de Microsoft Office dae sa 97 a sa XP? Pro calicunu fiat de utilidade e fintzas ispassiosu, ma pro sa parte manna de is usuàrios fiat infadosu, cun is animatziones e is cussìgios suos a sighidura. De sòlitu, finiant pro ddu cuare. Oe, craru, pro is de nois chi ant incumentzadu in cussos annos a impreare s'elaboradore pro traballare, Clippy e is àteros assistentes sunt unu regordu nostàlgicu.

Sa Free Software Foundation at ghetadu una petitzione pro "liberare" Clippy dae sa presone sua de lissèntzia propietària.

Is raportos de is prepostos a is traballos sugerint chi Clippy est ancora biu e est detentu in suta de una lissèntzia de programma propietàriu contra sa voluntade sua.

Sa petitzione, si cumprendet, est una brulla cun su sentidu, in realidade, de pedire a Microsoft un'atentzione prus manna a sa libertade de is usuàrios suos e a s'àtera petitzione, sa pro sa publicatzione de Windows 7, unu de is sistemas operativos prus istimados dae is impitadores e abbandonadu cun sa fine de is annoamentos, comente a programma lìberu.

Cummenta