Yahoo! Italia non pùblicat prus cuntènnidos

Yahoo!, servìtziu famadu pro su motore de chirca suo, chi annos a oe fiat fintzas prus connotu de Google, at pigadu una detzisione chi sinnat sa fine de un'època.

S'aventura sua est incumentzada comente a regorta simpre de ligòngios de is giassos preferidos de is imbentores suos. A pagu a pagu custos ligòngios fiant essende medas, duncas est arribadu su motore de chirca, chi permitiat de ddos agatare in manera lestra. Cun su tempus su servìtziu s'est evolutzionadu, essende unu portale, cuntzetu chi me is annos 90 e is primos 2000 fiat de importu. Si sunt agiuntas is noas, su servìziu de posta eletrònica, sa messageria istantànea e àteru meda. Est istadu fintzas famadu meda Yahoo! Answers chi però dd'ant serradu giai duos annos a oe.

A nàrrere sa beridade, Yahoo non tenet unu motore de chirca suo dae su 2008. Is resurtados de sa chirca sunt difatis de Bing, su motore de Microsoft. Est unu destinu comunu a servìtzios medas chi fiant famados me is annos de sa giovanesa de Internet. Oe in die difatis is servìtzios de chirca chi frunint unu servìtziu pròpiu, a foras de Google e Bing, sunt abarrados pagos: intre custos regordamus DuckDuckGo, chi esistit fintzas in limba sarda, e istella, su motore de Tiscali.

Non s'ischit si custu càmbiu siat parte de un'istrategia noa o de una ruta chi non si firmat prus. Me is ùrtimos annos amus intèndidu noas medas in cuntrastu. Pro esempru in su 2016 eus ischidu chi sa sede italiana fiat serrende, ma in su 2021 su servìtziu pariat funtzionende mègius, mancari in su pròpiu tempus fiat lassende sa Tzina. Calicunu at pensadu chi s'idea potzat èssere sa de donare un'aviu nou a su motore de chirca, ma no ischimus nudda de seguru.
In unu mundu in ue fintzas is prataformas chi guadàngiant prus dinari depet lassare in domo a traballadores medas, non si cumprendet cale potzat èssere su destinu pro unu servìtziu chi is impitadores de su web non ddis ammustrant prus un'interessu mannu.