Adiosu a Microsoft Internet Explorer

Dd'iant annuntziau de diora e in custu diàriu no eus tentu fueddus de garbu po custu navigadori: Microsoft at arretirau Internet Explorer de sa butega sua su 15 de làmpadas passau, acabendi po sèmpiri cun su svilupu e su suportu.

Pagus fiant sighendi impreendi-ddu, giai chi su navigadori pre-definiu de Microsoft me is ùrtimas versionis de Windows est Edge, chi cumpartzit su pròpiu còdixi cun Google Chrome.

Sa fini de Internet Explorer at donau s'incumentzu a una sèrie de meme de ìnternet spassiosus meda, chi ant brullau apitzus de sa lentesa, s'instabilidadi e sa pagu seguresa de su navigadori de domu Microsoft, ma de seguru sa brulla prus manna est sa de Jung Ki-Young, ingennieri de programa sud-coreanu chi at fatu una losa a Explorer, cun sa data de sa primu versioni e sa de su 15 de làmpadas de ocannu, e una scrita chi narat "Fiat unu trastu bellu po scarrigai àterus navigadoris", una brulla spassiosa ma no noa, giai chi unus 12 annus a oi o fintzas de prus ddoi fiat unu demotivational cun sa scrita "Internet Explorer - Est perfetu - po scarrigai Firefox".
Cun custa pedra acabat sa stòria de su chi fiat po annus su navigadori prus impreau in su mundu ma chi, a sa fini, no est mai praxu meda a nemus.

Sa màgini de s'artìculu dd'apu pigada de custu vìdeu de Reuters.